#القصائد_الفاطمية
قصيدة رقم ٥


ميمر للزهراء (ع)



بهذا الدمع مثل الشمع
للزهره والكسر الضلع
ننحب نذوب بحسرات هالليله وانواسيها


عالزهره والكسر الضلع بالدمعه
ننحب عليها انذوب مثل الشمعه
ضاگت علينه الدنيه هاي الوسعه
من ثگل بابـك الطاهــره والدفعه
ازغيرة عمر من تنعصر
ينعصر معناها الخدر
واجب علينا بهل يوم للزهره من نرثيها


بعــد الصبــر والنايـبـه والاحـــزان
ناح العرش واهل العرش والميزان
يدرون بالــزهـره اصول الفـرقـــان
لي هسه ظـل ينحب عليها القــرآن
اهل السمه تبچي بدمه
الكسر الضلع والفاطمه
حتى العرش والاملاك تبچي وتنوح اعليها



حضرت شياطين الارض وسط الدار
دار الــوحي اليحـمـل جميع الاسرار
وانعصرت الزهـره وضلع ألها اندار
يشكي الظليمه مـن فـعــل هالاشرار
هجمت حقد مو عن بعد
بالحايط و مات الورد
معقوله هاي الزهراء هجمت حقد تاذيها


بيا منطق وحجه وشـرع اذوهــا
ومابين باب وحايط ايعصروهـــا
يدروها طاحت عالارض يدروها
ليش ام ابوها تنحب ايخـلـوهــــا
طاحت شمس واهل الرجس
ياوسفه بيها ماتحس
تاليها واحد ملعون يعصرها ويبچيها



طاحت الـزهــره بت محمد للگــاع
تنحب تــون ومكـسرات الأضــــلاع
بالـدفـعـــه حتى الباب صايــر طماع
وحلم الطفوله بمحسن الطايح ضاع
راح الولد وماظل مهد
لو صايحه الزهره مدد
تنزل جميع الاملاك للزهره وتحاميها


اختم الـك واسمعـنـي يلي اتودها
بنور المجالس احضر وشاهـدهـا
والحاجتك اطلب واخذ من عـدهـا
بس يمها اذكــر بالعــزه والدهـا
عهد الوفه بكل عاطفه
بينك وبين المصطفه
ماتنسه بنته الزهراء وبروحك اتخليها







لاتنسون والدي وابني عباس من الرحمه والمغفره خادمكم رياض الرسل الجابري

#القصائد_الفاطمية
قصيدة رقم ٦


تجليبة الزهراء (ع)



على اجروح الصبر والدمعه والحسره
هالليله ننوح ونبچي عالزهره
١
اليحب أم الحسن يلطم يدگ ينعه
وخل يكسر بمجلس ضلع من ضلعه
الزهره بالعزه تستاهل الدمعه
اذا تبچي عليها وتنحب بعبره
٢
منك تعرف انته اشرايده فاطم
ألها بكل ولائك تحضر ولاطم
حتى اتصير ألها وتنحسب خادم
كون ايصير حضك عالي واشكبره
٣
عليها الباب مدفوع بحقد نيه
وفاطم بالعرش مكتوبه قدسيه
اشگد صعبه أذا تنضرب علويه
وبالحايط الزهره تنعصر عصره
٤
حرگ باب الوحي وبعمل شيطاني
الاول وبحقد من ارسل الثاني
خل يسمع القاصي ويعرف الداني
ناس وللأسف مو طاهره البذره
٥
حيدر من صبر مو عجبه والي صار
بس هيه الوصيه امچتفه الكرار
ذوله مو زلم وهواي ذوالفقار
عليهم بس علي يتميز بصبره
٦

ماتت فاطم وبليل دفنوها
ومحد ماطلع خاطر ايشيعوها
من كثر المواجع تون خلوها
وهسه ابلا گبر لا صحن لا حضره
٧
راح اختم الك والعله مو بالباب
بالسموا نفسهم للأسف اصحاب
هز العرش صوت الضلع من انصاب
بوجوه الغريبه الحاقده الصفره



لاتنسون والدي وابني عباس من الرحمه والغفران
خادمكم رياض الرسل الجابري

#القصائد_الفاطمية
قصيدة رقم ٧


نزلة / استشهاد الزهراء عليها السلام
 
على الزچية واويلاه  على الزچيه واويلاه
 
 يابوية فاطم تبچي وتنوح
ملچومه فاطم من الجروح
ياويلي بويه وطلعت الروح
ماتت مهجته ماظلت وياه
 
شيعهه حيدر وحده بليل
رد لوحده متهدم الحيل
عگب الزجيه شايف الويل
كسره وبالضلع وشلون ينساه
 
 
دافن فاطمة ويهل الاتراب
صعبة بين اديه ويدفن احباب
هالليله يگضي بلوعه ومصاب
ويبچي الحسين بصفه يلگاه
 
عن المايرد وبگبره مدفون
تپجي وماهدت دمعات العيون
وزينب والحسن بحظانه يبچون
وچودر ياحزن بالفرگه والاه
 
مدفونه ويشيع ١٢ معصوم
غابت بالسمه مدفونه الانجوم
ياويلي حيدر كلبه ملچوم
گبرج مختفي وبگلبه ظماه
 
مكسوره كل اضلاعج اليوم
وزينب ترجف وماشافت النوم
وحسين البقه يشتم بالهدوم
وامتد لطفوف هناك شفناه
 
هذا الماحسبت حسابه ويصير
الباب تحزم بكومة بسامير
بلحظات الاخيره وهيه لدير
عين اعله حيدر چنهه تنعاه
 
 
خادم رقية عليها السلام
الشاعر مهند الدريساوي

#القصائد_الفاطمية
قصيدة رقم ٨


مقدمة الزهراء عليها السلام

طب للبيت ـ شاف البيت ـ خالي من فاطمه


يطب الدارها ويخــــــتنگ بالوحشه
علي ملچـــوم فارگ ضحكت القبشه
يشوف حسين بيده افراشها ايفرشه
ويحس ابگلبه نار اومنگـــطع هرشه

وين ايروح ـ كلها اتنوح ـ حتى الارض والسمه
**

گطـعو مــنه ورده وذبل بســـــتانه
مــر بيه الخــريف ويبست اقصانه
يطــــب للـدار يلگـه الدار حـــزنانه
على الزهره نحيل اوروحه خلصانه

كل اغروب ــ گلبه ايذوب ــ مجروح حامي الحمه
****

بالتغســـيل شــاف الما امســـــولفته
زعل بس الوصــــــــــيه ابهاي لازمته
شاف السطره البخدها وبچه ابسكته
العقيله اتموت كون ينــــوح سامعته

بالتغسيل ـ باد الحيل ـ ودنيا صفت مظلمه
****

علي اتعـــذب دليله ابفرگت الزهره
كلشي اضلم عليه من ماتت الگمره
مـن يذكـر ظلعها ويذكـر الصــطره
تهيـج اجروحه كلها ويختنگ عبره

صابه البين ـ بم احسين ـ وسهم البعد المه
****

يگعــــــد يم گبــــرها وينحب وينعه
موضلع الزچيه ألي انكســــــر ضلعه
يكـــابر عالالم گوه ابجــفه البضـــعه
تبچي وتوگف اعله ادموعهه الشمعه

ابگلبه النار ــ فكره احتار ــ من المدامع عمه
***

      الخادم
كامل السعيدي

#القصائد_الفاطمية
قصيدة رقم ٩


نزله سريعه لمجالس الليالي الفاطميه
عهد الولاء  لفاطمة الزهراء .
....موشح
.
.
عالعهد والبصمه من دمي الجره
ما أعوف الزهـــــره دنـيا وآخره
.
هذا عهدي الفاطمه هذا عهدي
.
.
رافضـي وابقـى افتـخر بـالمعـتــقد
ورضـعت حـب الــزچيه من المهــد
حيــدري وثـــابت يقــيـني وللابــد
ما أبـأيـع والله بـــس خيــر الـورى
.
هذا عهدي الفاطمه هذا عهدي
.
.
واليحبكم للـــذبـح مـــاظــن يهــاب
حتـلو سحگو ضلـوعه اعله التــراب
حتـلو طــبروني بسـيوف وحـــراب
دمي يهتف لو نـــــزف فـوگ الثره

هذا عهدي الفاطمه هذا عهدي
.
.
يالحزينه بكـعـبـتچ كـل ليــوم أطوف
وانـــدب مصابچ وون اعله الطـفوف
عالتـرب يالبـضعه مگطوعه الچفوف
منها چف يالـــزهره گطـــعو خنصره

هذا عهدي الفاطمه هذا عهدي
.
.
ابقـى اذكر جمرة صّــــوابچ ونـــوح
والگلـب يالبضـعه ينبـض بالجــروح
والي فــاگد ثـاره بعــد المن يـــروح
مالي غيــر المهـدي ابقـى اتنـــطره

هذا عهدي الفاطمه هذا عهدي
.
.
ابقى الطــم يـالزچيه بكــل عـزاء
عمري يرخـص والدمه الكـم فداء
يلـي يومـچ هـذا مثـله بكـربـــلاء
شفتـي چم خد أنسطر  يالطـاهره

هذا عهدي الفاطمه هذا عهدي
.
.
حگـي لجـلچ  من  اذوب بـحــسـرتـي
انتــي حـزني وانتي جرحي وعبـرتي
انتي ديني وكـل يقيني وكعـبـــتي
عهدي خادم أبقـى دنــــيا وآخـــره

هذا عهدي الفاطمه هذا عهدي
.
.
.
حسن الموالي الفاطمي
.

قصائد وفاة السيد محمد بن الامام علي الهادي " عليه السلام" سبع الدجيل

يهدى ثوابها إلى روح
السيد يوسف مجيد الموسوي
رحم الله من قرأ سورة الفاتحة على روحه
مسبوقة بالصلاة على محمد وآلِ محمد

#سبع_الدجيل
قصيدة ١

شوط كربلائي لوفاة سبع الدجيل "عليه السلام"
ابو جعفر محمد بن الإمام علي الهادي "عليهما السلام"
الشاعر السيد عبد الحسين الشرع النجفي "رحمه الله"


يامن تطلب الحاجات  جد السير و اتعنّه
واگصد سيد امحمد  واطلب حاجتك مِنّه
........
بمرك لا تظل حاير  او عندك للحوايج باب
بيها رحمة الباري  او ليها اللي گصد ما خاب
دونك سيد امحمد   الما طب حضرته طلّاب
اله او بالمسرَّه ايعود
مِنّه ابغاية المگصود
بي من يسأل المعبود
دنيه او آخره ينطيه  والهم ينچشف عنه
........
ساحة حضرته بيها  الكل علّه دوه واعلاج
ما واحد تعنّاها  او من عدها سدر محتاج
ما بين السمه او بينه  لملاك السبع معراج
تنزل وبضريحه اتطوف
والزوار گبره اتشـوف
توگف عله الباب اصفوف
كل زايــر يحـــيّــونه  ويبشروه بالجــنّـه
........
الزاير لو لفه ايحيوه  او من يسدر يودعونه
ويشكرون سعوانه او بالجنّه يبشرونه
عيسى انچان للأعمه  رد النور لعيونه
هوَّه اشچم عمه الطب ليه
او رد ابساع نوره اعليه
او چم واحد عدل رجليه
وبفضله او براهيــنه  تشهـد شيعه او سنه
........
معاجز ظهرت الجوده ما تنحصه او ما تنعد
بيها اهل السمه تدري او كل اهل الأرض تشهد
يامن تطلب المعروف دونك سيد امحمد
بضعه من علي الهادي
شع ابنوره الوادي
طب الحضرته او نادي
جينه ابعودك انعزّيك وعليه نجذب الونّه
........
شلها الوادم اعليكم يشراف العرب يمجاد
خلوكم شتت بالبر او منكم كل گبر ببلاد
وصه المصطفه بيكم وهم سوَّو عكس ما راد
ياهو الما گضه بالسم
او چبده انمرد وتخذّم
حته الطفل ما يسلم
والعريس من عدكم ابدم النحر يتحنّه
........
هضمتكم يهل هالبيـت من عدها يشيب الراس
خلي الچتل هذا انگـول عاده او جرت عند الناس
لاچن الچثث بالخيـل هاي ابيا شرع تنداس
والنسوان يسبوها
او عالهزَّل يرچبوها
والتنحب يضربوها
كل ساعه البلد ميشوم عالهزَّل يطبّنّه
........
زينب نادت الحادي او منها الروح مالومه
يحادي الضعن الله اعليك سو دربك عله الحومه
شوف الحرم فوگ النوگ تتصارخ او مهظومه
تريد اتشـوف اهاليها
او تودعها او تحاچيها
او تدوَّر عاليحاميها
او يتعنن لبو فاضل مداليله او يحاچنّه
........
نريد انشوف ابو فاضل شنهي نيته اويانه
من يثرب تچفّلنه اشلون ايعوفنه اهنانه
ما ضني يهون اعليه نمشي ابولية اعدانه
ادري يبن فارس بدر
ما يرضه نمشي ابها اليسر
واللي يبارينه زجر
وانطب دواوين الكفر
لاچن بطل حيلي اعليه اچفوفه الفحل خاننه
........
لحد يا گمر هاشم يبو فاضل يوالينه
من يثرب طلعنه اوياك وانته اتچفلت بينه
نوَّو عالمسير اعداك ما تنهض تبارينه
انهض يبو فاضل عجل
باري اليتامه العالهزل
چه ترضه لخواتك تذل
مهظومه والمدمع يهل
منطيهن بخت واليوم ذاك البخت يردنه
........

الشاعر السيد عبد الحسين الشرع النجفي "رحمه الله"

#سبع_الدجيل
قصيدة ٢
ميمر

سبع الدجيل اتعناه.      لمحمد ابن الهادي
★★★★★
عنده كرامات شكثر موصوفه
كلها فخر بين الخلگ. معروفه
بفيض الكرم والجود تنطي اچفوفه
عونه الگصد ليه وراح.   وبِسمه الشريف ينادي
★★★★★
اگصد لبو جعفر وانحب يمه
واشكيله  همك وابچي لوعة همه
تزول المحن من خاطرك والظلمه
ابغرة شبابه المهيوب.   الموت غَرَّب حادي
★★★★★
من والده طِيْب وعبير ونسمه
تقوى وعبادات وشجاعة وحكمه
ذاك الْرُبَه بحظن المجد. والعصمه
ياجاهي مابين اثنين.  بضل دنيتي وميعادي
★★★★★
لوعذَّبَك جور الزمان وجاسك
والناس صارت هلوكت موناسك
والدنيا مگصدها  تِشيَّب راسك
اگصد الباب الحاجات.  وخله اليعادي ايعادي
★★★★★
الهادي ظهره منكسر بغيابك
والعسكري شگ الهِدْم بمصابك
والشيعه  عَنَّايَه   تون ابابك
كل كتر لجلك مفجوع. حتى الجبل والوادي
★★★★★
عطر الإمامة بسيرتك يبرالك
التاريخ يشهد عن جميل أفعالك
المعلول والمهموم يروي افضالك
بفضلك تزول اللوعات . ويطيب شربي وزادي

★★★★★
ليك ابعذابي ودمعتي متعني
خادم الك   يبن النبي تقبلني
بفيض الكرم يابوالكرم تشملني
ياگاضي حاجات الناس.  اتعنيت اريد امرادي

الشاعر حسن لعيبي الحريشاوي

قصائد وفاة السيدة زينب "عليها السلام"

يهدى ثوابها إلى روح
السيد يوسف مجيد الموسوي
رحم الله من قرأ سورة الفاتحة على روحه
مسبوقة بالصلاة على محمد وآلِ محمد

#وفاة_السيدة_زينب_عليها_السلام
قصيدة رقم ١

شوط كربلائي
لذكرى لوفاة الحوراء زينب ع


يزينب والاجل گرب وحانت ساعة الفرگه
لحد يوم المنيه وياچ صور لخيام محترگه

ـــــــــــــــــ ❁ ❁ ❁ ــــــــــــــــــ

لـفاچ الموت يـازينب غريبـه ولا اهـل يمچ
گضت ايامچ بلوعه مثل عمـر الزچيـه امچ
حزينه ولاغفتلچ عين يذوّب بالصخر همچ
تمنيتي الگمر عباس يجيچ الليله ويضمچ

بلايه چفوف تدرينه
يخليچ بوسط عينه
يدفنچ كون تردينه

يزينب والگمر هاليوم اجالچ ينعه وبحرگه
يزينب والاجل گرب وحانت سـاعة الفرگه

ـــــــــــــــــ ❁ ❁ ❁ ــــــــــــــــــ

تذكرين الجره والصار وانتي بأخر الانفاس
من طبيتي لارض الشام والتمت عليچ الناس
هالصوت بخيالچ عاش هاي اخت الـگمر عباس
يلبوة حيدر الكرار ياهيبه التشيل الراس

لحد يـوم المنيـه وياچ
صـور ايـتـام تتـنـخاچ
تخوفهم سياط اعداچ

تذكرين الجره بعاشور سبيه بهمها مختنگه
يزينب والاجل گرب وحانت سـاعة الفرگه

ـــــــــــــــــ ❁ ❁ ❁ ــــــــــــــــــ

غريبه من لفاچ الموت بديار الغرب صعبه
ماواحد حضر وياچ وحيده وماتت بغربه
بمصابچ تنوح الگاع نكسر حته الصخر گلبه
بعد ذيچ البطوله اليوم الموت عليچ مر دربه

گضـت دنيـاچ بـس الهم
عشتـي بدنيـه ماتـرحـم
بچت عينچ دمع من دم

وتجرين النفس كوه الحزن وياچ كل شهگه
يزينب والاجل گرب وحانت ساعة الفرگه

ـــــــــــــــــ ❁ ❁ ❁ ــــــــــــــــــ

ياوسفه والف ياحيف تنام عيونچ وتغفه
مظلومه انگضت دنياچ بالاحزان ياوسفه
بقساوه يمر عليچ اليله وعيونه شكثر صلفه
رغم كل اليمر والصار رمـز ظليتـي للعفـه

شاهدتي الحـزن الـوان
وصىرتي للوفه العنوان
بناتچ صـارن الاحـزان

يـا ام الحزن والنوح مثل حزنچ فـلا نلگه
يزينب والاجل گرب وحانت ساعة الفرگه


ـــــــــــــــــ ❁ ❁ ❁ ــــــــــــــــــ

بخيالچ للگمر تحچين تمنيت العمر لاطال
كون هناك مـت وياه ولا شدو ادي بحبال
يريت وياك دفنوني ونهـالت علي الرمـال
بس الموت ماجاني ومريت بعذاب اشكال

ماهمن بالوكت لوفات
وايامي التمر لحضات
من فرگاك گلبي مات

تمنيت الحوافر كون تدوس بگلبي وتسحكه
يزينب والاجل گرب وحانت ساعة الفرگه

ـــــــــــــــــ ❁ ❁ ❁ ــــــــــــــــــ

كلمات
عباس فاضل الشمري

#وفاة_السيدة_زينب_عليها_السلام
قصيدة رقم ٢

موشح لذكرى لوفاة الحوراء زينب ع




زينب انطت منحر بوادي الطفوف
وقدمت رايه على الشاطي وچفوف
١

زينب المهضومه عاشت بس جرح
تمشي مابين العده بذاك الصبح
شلون حال الي اخوها منذبح
تگوم تركض حافيه ابين السيوف
٢

اتعاين المذبوحها وتدمع العين
اتصيح جاوب ياحبيبي ياحسين
وين انه والمصايب ذني وين
وگامت اعله جسد بالمدمع تطوف
٣

يالتحب زينب شنو اتصب دمع
هسه كونك باللطم تكسر ضلع
شلون زينب ترضه توگع تندفع
وتطر ميدان الزلم بين الصفوف
٤

زينب العاشت أميره أم الخدره
للشريعه اشجابها بذاك الظهر
تنظر العباس بدموع الصبر
اتگله انظر كون الك عين وتشوف
٥

شافت العباس وتدگ عالضلوع
وگام تنحب تبچي وتهل الدموع
الفاگده الخوان من حقها تلوع
وتمشي واتدوس الجمر بين الألوف
٦

كربله العاشت جرح بين السماء
شلون تشرب من دماء الشهداء
كربله لو عدها ذره من الحياء
چان ماترضه يذبحون الضيوف
٧

وهسه زينب سلمت لامر القدر
ماتت وتنحب على اچفوف ونحر
تبقه زينب راية العز والفخر
شامخه وهيبه رغم كل الانوف




شاعر اهل البيت (ع)
رياض الرسل الجابري

#وفاة_السيدة_زينب_عليها_السلام
قصيدة رقم ٣

نصاري للسيدة زينب عليها السلام
مهيمن يوسف الموسوي ١٤٤٥هـ ٢٠٢٤م


إجاها الموت زينب و الدمع سال
تذكر كل اهلها باصعب الحال
*١*
سنه ونص من بعد موت الأحبّه
إجه ليها الأجل و زداد قربه
فلا عباس حاضر وشلون صعبه
دمعها اعلى الاهل هاليوم همّال
*٢*
صعب هاليوم و شحال العقيله
جسدها امن القهر مهدوم حيله
تذكر طف كربله ابدمع اتسيله
وضعها نوصّفه صعبه ينگال
*٣*
زينب يا حزنها و القهر حيل
منها والدمع وهواي ويسيل
غريبه بالغرب وسفه والف ويل
قهرها بالگلب من هاي الأهوال
*٤*
بارض بيها السبي چان وقهر و آلام
آه امن الغرب يا ديرة الشام
على الحره العقيله اصعب الايام
عدوها وبحقد من زينب و نال
*٥*
اخوها حسين ماكو بهالأمر و الصار
تمنّت لو گصدها إبن لأطهار
لاچن ونچتل من أخسه لأشرار
عدها وانتهت من راح لآمال
*٦*
زينب بالمنيّه بيا وضعها
حسره بكل گلبها عالفجعها
لحد آخر نفس تهمل دمعها
مصايبها شكثر منها الفرح شال
*٧*
مصيبة زينب الحره شكبرها
من جاها الأجل يقهر أمرها
لأهل ماكو إجو بآخر عمرها
صبرها اعلى الحزن والكربله طال
*٨*
تموت الطاهره بنت الزچيّه
بارض جانت إجت ليها سبيّه
وشلون الأمر صعبه القضيّه
عدوها بالشماته بهالأمر گال
*٩*
اصعب كل حدث مر اعله زينب
مقهوره و ألم و بحسره تنحب
اهلها بالدفن و بهاي ترغب
لا واحد بقه منهم فلا ضال
*١٠*
تموت الطاهره ومنها تهل عين
على الكافل اخوها والولي حسين
وبطف كربله هالأخوه ميتين
وصبرها عالقدر عدها فلا مال


مهيمن يوسف الموسوي
١٤ رجب الأصب ١٤٤٥هـ
٢٠٢٤م/١/٢٦ يوم الجمعة ٦:١٢م

#وفاة_السيدة_زينب_عليها_السلام
قصيدة رقم ٤
موشح نجفي لاحتظار السيدة زينب عليها السلام
الشاعر ياسر العارضي

هاي زينب تحتظر بانفاسهه
ورادت اخوتهه تجي عد راسهه
*١*
هاي زينب باخر انفاس العمر
جييَت اخوتهه الهواشم تنتظر
روحهه ماتطلع والهُم تفُر
حسين يحضر رادت وعباسهه
*٢*
َهالمنيه المنهه ياوسفه دنت
وزينب ابهاي الحياة اتعذبت
بعد كل ذيج المأسي اتغربت
ويجي تتمنه اعز كل ناسهه
*٣*
ماتريد اتموت مايمهه أحد
لا أخو ايتجيلهه ولاكو ولد
من يجوهه والنفس للرب صعد
عدهه سهلهه وتنتعش باحساسهه
*٤*
هاي زينب وبأخير المرحله
من البدايه وهسه هاي التكمله
تريدهم كلهم شهامه ومرجله
كون يمهه الماكو من مقياسهه
*٥*
هاي اخير انفاس وي ذاك الحزن
اكَبالهم رادت يشوفهه تون
اشكَد حنينه اهواي لخوتهه تحن
والمحنه من اصلهه وساسهه


الشاعر ياسر العارضي

#وفاة_السيدة_زينب_عليها_السلام
قصيدة رقم ٥
هذه القصيدة ميمر مجنس + كربلائي


يالمنفجــع حــان الدمــع للورثت الطف والضلع
لام الحــزن يحلّه النــوح وتحلّه المــدامــع حمــره
**
لأم الحــزن حـگــها المدامــــع حمــــره
مـــنّ الــزغــر شافت مصــاب وحســره
مــن الدمع حگه النظر كفْ ألها
ذكــرت عدوها من ربط كف الها
مـــاتت غــريبه لا حضــر كافلها
بدمــع النــزل ويـن الكفــل نــادت گبــل ذاك الأجـــل
ريتــك ياخــو زينــب ريــت يــومي يخــويه أتحضره

*
عـمـــر العقيــلـــه بـــس حـــزن گاضيتـــه
لا مـــره مـــــر بيــــچ الفـــرح لا صيتـــه
وكتي ضگت مــن الزغــر بس مـــره
ردت الفـــرح بيّــه يمـــر بــس مره
بصــدري نبت يــوم الدفــع بسمــاره
مات الفرح وگلبي أنجرح بصدر أمي أحس هوه أنذبح
وبـــس الحـــزن والآلام خلتلــي ذيــــچ الـعصّــــره
**
يا ام الحـــزن يا جمــره ظلــت تسعــر
نـــادت احسهه والدمــع صــبْ احمــر
زينب انه وهــذا الحزن خاواني
ومن النحب لأمي بزغر خوّاني
للباب انوحن لو أنوح أخــواني
متحيره ومتمرمــره المــن انوحــن يـــا تــره
مــن الضلـع و البسمــار گمـــت انـــه أهـِل العبّره

*

صـعبـــه يــزينــب محنتـــــچ ارويهــــا
ونــار السبــي حســــرات تلهـــب بيها
نــار بدليلــي تستعــر مـــن طفـها
ميته عساني وي الأهل من طفهه
يا حسره زينب والشمر من طفها
بين الــدول عگب الأهل أبديــوان اطبن عالچتـــل
وگفتــي اگبـــال الشمـــات صعـــب الأمــر شيفسره

*

يمّ الـصبــر أيـــوب صبـــره أتحــيّـــر
صبــرچ يشوفـــه عالنــوايـــب اكبــر
من النحب بــرج الصبـر هــديّته
وگلبي بزغر بس الدمــع هاديته
كون الفـرات أعلى الخيّم هـديته
ويطفي الخيّم يستر حـــرم يــا وسفه من طــاح العلم
هجمّــت خيــول العـــدوان ولا ذاري خــدري يستــره

**

منيتــچ يـــا زينــب كــــل محــب يــدريها
لكــن يــا حـــره أنتــي بــلّله احچيـهـــا
بين أخوتي أمنيتي اندفن ودي آني
بـس الــزمن لأرض الغِــرب وداني
القاصي لمصابي خـل يون والداني
يهل مدمعـــه للفاجعـــه يوميــه أشوف المشرعه
وبأرض الغـــرب انــه أهناك حســره تجــر بحــســره
**
الشاعر
موسى البديري

قصائد شهادة الامام الكاظم "عليه السلام"
يهدى ثوابها إلى روح
السيد يوسف مجيد الموسوي
رحم الله من قرأ سورة الفاتحة على روحه
مسبوقة بالصلاة على محمد وآلِ محمد

#قصائد_الامام_الكاظم_عليه_السلام
قصيدة رقم ١


دارمي بحق الامام الكاظم عليه السلام
الشاعر الشيخ كاظم المنظور الكربلائي
"رحمه الله تعالى"
ثلاث دكات كربلائية

يابو الرضا إعله الديـن سجنك مصيبه
إو سمك بلب إحشاه وجر لهيبه
* * *
سهم الدهر وافاك گبل المنيه
إو جمر السجن بحشاك ناره سريه
وثگل الزرد خلاك ونتك خفيه
والگلبك المالوم صبرك طبيبه
* * *
وإبسجنك إيروّيك چـاس ألإطاعه
للباري وإيغذيك روح المناعه
إو عن الضوه إيكفيك نورك شعاعه
إو تنشغ هبوب الريح من ثمر طيبه
* * *
يابو الرضا إو للآه سلمت أمرك
ما تجزع إو ليضيق بالسجن صدرك
صابر عله بلواك وإنشكر صبرك
إو أجر الصبر ميضيع بألله وحبيبه
* * *
يل بالسجن مطروح وإيجلبك الهم
إو من ساك المجروح يتفايض الدم
إمن سطرة السجان وجهك توسم
أحّا يسوط البيه متنك يصيبه
* * *
صبرك يبو إبراهيم مو صبر آيـه
بيه إجرعت چاسات سم المنايه
غير إنتصار الدين ما إلك غايه
والدهر دوم إوياك يعلن حريبه
* * *
طحت إبسجن هارون ألله يعينك
يالوافتك دنياك جمرة ونينك
إبديرة غرب وإتدير للأهل عينك
إو تربي إو تهل إدموع عين الغريبه
* * *
يابو الرضا إمن الجور ما نمـت ليلك
أحّا يقيد البيه هدمو حيلك
أحّا يسم البيه گطعو دليلك
إو عالم العلوي إعليك كبر نحيبه
* * *
وإعله الجسر خلوه جسمك رهينه
مرمي ثلث تيام وإمحددينه
مثل الشهيد حسين ما دافنينه
إو زينب عگب عيناه ظلت إبريبه
* * *
من عادة المسجون من يكتلونـه
لا بد هله إيحضرون وإيشيعونه
وثگل الحديد إوياه ما يدفنونه
وإبگلب اليواريه جمره رهيبه
* * *

الشاعر الشيخ كاظم المنظور الكربلائي
"رحمه الله تعالى"

#قصائد_الامام_الكاظم_عليه_السلام
قصيدة رقم ٢


موشح بحق الامام الكاظم عليه السلام
الشاعر الشيخ كاظم المنظور الكربلائي
"رحمه الله تعالى"


يا غريب الـدار يفداك العمر
إشچان ذنبك تنچتل بالسم غدر
* ١ *
تنچتل مسموم وإبحبس الرشيد
آه والنعشك يشيلونه العبيد
إمحدد إو ما فارگك ثگل الحديد
إلا من جسمك توسد بالگبر
* ٢ *
لون من ساير الوادم ينچتل
إيشيعونه إو نعشه بالعز ينحمل
وإنتـه نعشك آه يالمالك مثل
عالجسر مطروح ظل يبن الطهر
* ٣ *
سيدي إبدنياك راحه ما شفت
بالسگم والهظم والونه عشت
إومن سجن السجن تتسلم چنت
إو بيد حارس ناصبي إو مشرچ زجر
* ٤ *
عادة المسجون لو أمسه المسه
يّخلون إوياه ضي إليانسه
آه بس إنته ينجل أهل اكسه
إبسجن مظلم تجرع إبچاس الصبر
* ٥ *
عادة المسجون لو چان إبغرب
ينخشعله إو يحـن كل قاسي گلب
إشلون حالك سيدي إبسجن النصب
تجذب الحسرات تتلاهب جمر
* ٦ *
عادة المسجون ما بين المله
إتوادده گومه إو بني عمه أو هله
إتشوف حاله إو بالدهاه إتسايله
وإنته ما چان إلك عون إو لا ذخر
* ٧ *
إبكل حبس لو چان مسجون إو غريب
يصح مسلم عون إله الصوته مجيب
لچن بس إنته يبن بنت الحبيب
ما نغر لك واحد إمن أهل الغدر
* ٨ *
إتلوج وحدك بالسجن مالك معين
إو لا گرابه إو لا أخـو مشفج حنين
واليسلي چبدك إلون والحنين
إي وحگ مجدك يمتبوع النصر
* ٩ *
ما رأت عين إو إذن سمعت حبس
ما يمر كوكب عليه إو لاشمس
إو لا إلك بي چان يمنتب ونس
إو لايهب ريح النسم بيه إو يمر
* ١٠ *
ما رأت عين إو إذن سمعت أخبار
سجن ما ينعرف ليله إمن النهار
إلّه سجن البيه چنت يبن ألأطهار
مثل جُب يوسف إو يرها بالعسر
* ١١ *
لو أوصّف سجنك الشيعتك چان
ما يشف منها الدمع طول الزمان
إو لا ضحك سنها إو رمت ثوب ألأحزان
إلا من ينتهض سلطان العصر
* ١٢ *
ذاك يوم البيه يشف دمع الإسلام
إو تغمض إعيـون المسلمين إو تنام
إو ينطفي من ضامر الدين الضرام
لمن راعي ألأمر يتوله ألأمر
* ١٣ *
إو يسل سيفه إو رايته إبچفه ترف
يا لثار حسين وأصحابه إيهتف
إوياخذ الثارات كل واحد بألف
إو ينجد ألإسلام من جـور الكفر
* * *


الشاعر الشيخ كاظم المنظور الكربلائي
"رحمه الله تعالى"